Portugal: Perdemedikasie in frikkadelle gevind

2013-03-08 13:50

 Lissabon – Burgers en frikkadelle wat in Portugal deur die Franse handelaar Auchan verkoop word, bevat glo perdevleis met klein hoeveelhede van ‘n pynstiller vir diere wat potensieel skadelik vir mense kan wees, het Portugal se verbruikerswaghond Donderdag gesê.

Die waghond, Deco, het gesê hy het “teen-inflammatoriese medikasie in perdevleis opgemerk wat in voedselprodukte in Portugal gevind is. Dit kan ‘n gesondheidsrisiko inhou, aangesien die gebruik van sulke middels verbied word in diere wat deur mense geëet gaan word.”

"Fenielbutasoon is in monsters van Auchan se hamburgers en in Polegar-frikkadelle gevind wat volgens ‘n voorlopige analise DNS van perdevleis bevat het,” het die groep in ‘n verklaring gesê.

Polegar is Auchan se laekoste-handelsmerk.

Volgens Deco was daar slegs lae vlakke van fenielbutasoon en dit hou nie ‘n “onmiddellike gevaar” in vir mense se gesondheid nie.

– Volg Nuus24 op Twitter

- AFP