Politikus aangekla van massamoord
2009-11-27 15:02
Manila – ‘n Fillipynse politikus is Vrydag op sewe aanklagtes van moord aangekla, nadat owerhede bevind het dat hy soldate, polisie en ander gewapende mans beveel het om 57 weerlose mense dood te maak.
Burgemeester Andal Ampatuan jnr, 'n goeie vriend van pres. Gloria Arroyo, is van moord aangekla, het die regering bevestig.
“Hy was die een wat die instruksies gegee het. Hy was tussen hulle wat die slagoffers doodgemaak het,” het Agnes Devanadera, sekretaris van justisie gesê.
Sy het aangedui dat meer klagtes teen hom ingedien kan word.
Devanadera het ook bekend gemaak dat die verdagte se pa, leier van die Ampatuan-groep en goewerneur van die Maguindanao provinsie, is een van agt ander lede van die magtige familie wat ook ondersoek word. Hulle mag nie die land verlaat nie.
‘n Emosionele Devanadera het Vrydag in detail beskryf hoe Maandag se massamoord plaasgevind het, en gesê die vroulike slagoffers was moontlik ook verkrag.
Ooggetuies het vertel hoe Ampatuan jnr. sy private millitêre mag van meer as 100 gewapende mans beveel het om op die groep mense los te brand.
Die gewapende mans het die konvooi met familielede en joernaliste van die politikus Esmael Mangudadatu gekaap. Die groep was op pad na die verkiesingskantore sodat Mangudadatu se vrou hom kon nomineer as provinsiale goewerneur in volgende jaar se verkiesing.
Altesaam 57 liggame is in vlak grafte gevind, waarvan 22 die liggame van vroue was.
Sewe-en-twintig van die slagoffers was joernaliste.
Die 40-jarige Ampatuan jnr., wat homself Donderdag aan owerhede oorgegee het, het sy betrokkenheid ontken en Moslem-rebelle die skuld gegee vir die moorde.
Hy staar lewenslange tronkstraf in die gesig, omdat die Fillipyne nie die doodstraf het nie.
- Sapa-AFP