Polisie skiet vermeende moordenaar dood
2011-10-06 23:14
San Fransisco – Die polisie het Donderdag ‘n man doodgeskiet wat daarvan verdink word dat hy drie werkers by ‘n sementaanleg in Silicon Valley, Kalifornië, doodgeskiet het.
Die verdagte is uitgeken as Shareef Allman (45), ‘n operateur van swaar toerusting by die maatskappy in Cupertino.
Ses werkers is in die aanval beseer en Allman het ook vermoedelik ‘n vrou in ‘n blykbare motorkaping, kort ná die skietery, geskiet en beseer.
Drie polisiebeamptes op patrollie het Allman Donderdagoggend ná ‘n reuse-soektog doodgeskiet, het Laurie Smith, polisiehoof in die Santa Clara-streek, gesê. Die beamptes het ‘n man wat die beskrywing van Almman gepas het, gesien waar hy met ‘n geweer agter ‘n motor gehurk het. Hulle het hom genader en geskiet.
“Ek is bly ons kon die situasie oplos,” het Smith by ‘n nuuskonferensie gesê, “maar dit is jammer dat ‘n bykomende persoon gesterf het.”
Volgens die polisie het Allman ontsteld geraak by ‘n vroegoggend-veiligheidsvergadering by die aanleg se kantoor. Hy het die vergadering verlaat, minute later met ‘n geweer teruggekeer en op sy kollegas losgebrand.
- Volg Nuus24 op Twitter
- Sapa-DPA