Polisie skiet man dood ná Discovery-gyseldrama

2010-09-02 01:00

Silver Spring, Maryland - Die polisie sê 'n gewapende man wat drie mense by Discovery Channel se hoofkwartiere as gyselaars aangehou het, is dood ná die polisie hom geskiet het.

Al drie gyselaars het ongedeerd ontsnap.

Die polisie het 'n paar uur met James Jay Lee onderhandel ná hy omstreeks 19:00 in die gebou in Washington gestorm het.

Hy het 'n vuurwapen rondgeswaai en plofstof was aan sy lyf vasgemaak.

Thomas Manger, polisiehoof, het gesê 'n plofbare toestel het dalk ontplof en dat die verdagte dalk ander toestelle in die gebou gebring het.

Hy het gesê sover hy weet, het die 1900 mense wat in die gebou werk veilig uit die gebou ontsnap.

 

- AP