Polisie red twee vroue ná groep hulle wil brand
2013-02-13 12:02
Sydney – Die polisie in Papoea-Nieu-Guinee het twee vroue wat van heksery beskuldig is, gered voor 'n groep mense hulle aan die brand kon steek, het ‘n berig Woensdag gelui.
Dié dramatiese reddingspoging kom enkele dae nadat ‘n jong ma wat van heksery beskuldig is, lewend deur ‘n ander groep verbrand is.
Bewerings van heksery is ‘n prioriteit vir beamptes ná dié saak van die 20-jarige vrou wat verlede week uitgetrek, met petrol gegooi en aan die brand gesteek is, het Teddy Tei, polisiebevelvoerder, aan The National-koerant gesê.
Die vrou, wat deur The National as die 20-jarige Kepari Leniata geïdentifiseer is, is glo in Mount Hagen met ‘n strykyster gemartel, vasgebind, en aan die brand gesteek bo-op ‘n hoop vullis en buitebande.
Sy is daarvan beskuldig dat sy ‘n sesjarige seun se dood veroorsaak het.
In die jongste voorval Maandag, wat ook in Mount Hagen plaasgevind het, is twee bejaarde vroue aan pale vasgebind en mense het gereedgemaak om hulle weens die dood van ‘n agtjarige meisie aan die brand te steek.
Die meisie se familie beweer die vroue het die kind se dood deur heksery veroorsaak, maar Tei sê sy is “verkrag en deur twee bekende verdagtes vermoor”. Dié verdagtes was deel van die groep wat die vroue aangeval het.
Tei sê die polisie, wat ‘n wenk van een van die getuies ontvang het, het die vroue gered en 20 mense is in hegtenis geneem.
Hy het ‘n beroep op die publiek gedoen om nie die wet in eie hande te neem nie.
– Volg Nuus24 op Twitter
- Sapa - AFP
