Polisie probeer lyke van ongelukslagoffers uitken
2011-11-06 14:50
Taunton – Speurders is besig om die sewe lyke uit te ken nadat ‘n reuse-ongeluk op ‘n snelweg in Brittanje gebeur het.
Volgens die polisie is geen ander lyke oornag gevind nie. Die 34 voertuie, wat Vrydagaand in die ongeluk op die M5 naby Taunton in die suidweste van Engeland betrokke was, is intussen ontruim.
Dié reuse opeenhoping het Vrydagaand om 20:25 in nat en mistige weerstoestande plaasgevind.
Een-en-vyftig ander mense is in die ongeluk beseer.
Ooggetuies het vertel hoe hulle ontploffings gehoor het en wrakstukke en beseerde mense op die pad sien lê het.
Tientalle brandbestryders het gewerk om mense wat in die wrakke van hul voertuie vasgekeer was te red. Die polisie het gesê ‘n lang stuk van die snelweg is gesluit en sal nie voor 24 uur weer oop wees nie.
Beeldmateriaal wat minute na die botsing geneem is wys hoe motoriste hul eie lewens op die spel plaas om mense wat in hul brandende voertuie vasgekeer is te probeer red.
– Volg Nuus24 op Twitter.
- Sapa - AFP