Polisie op spoor van meisie wat hondjies verdrink
2010-09-03 22:40
Sarajewo – Polisie in Bosnië beweer dat hulle ‘n jong vrou opgespoor het wat op ‘n video vasgevang is waar sy pasgebore hondjies in ‘n rivier gooi.
Polisie in die sentraal Bosniese dorp Bugojno sê hulle vermoed hulle het die meisie gevind wat in ‘n video gesien kan word waar sy ses pasgebore hondjies een vir een in ‘n rivier gooi om te verdrink.
Die ontstellende video het wêreldwye woede uitgelok nadat dit vroeër in die week op die internet gepubliseer is.
Die polisie beweer hulle het die meisie, wat minderjarig is, opgespoor deur wenke te volg wat deur dierebeskermingsgroepe in die land gegee is.
Die meisie se ouers sal binnekort ondervra word, het die polisie gesê.
‘n Nuwe dierebeskermingswet wat onlangs van toepassing gemaak is bepaal dat mense tot €5 000 (sowat R46 500) beboet kan word vir dieremishandeling.
Volg Nuus24 op Twitter
- Sapa - AP