Polisie op soek na reeksverkragter in Frankryk
2012-08-10 23:00
Parys – ‘n Vermeende reeksverkragter slaan toe op jongmeisies wat by kampeerterreine in die Ardeche-streek van Sentraal-Frankryk vakansie hou, het die plaaslike polisie Vrydag gesê.
‘n Reuse-soektog is in die omgewing van stapel gestuur en eienaars van kampeerterreine is gevra om hul sekuriteit te verskerp nadat ‘n 11-jarige Franse meisie Woensdag verkrag is.
Die slagoffer is aangeval terwyl sy in ‘n tent by ‘n kampeerterrein by Saint-Didier-sous-Aubenas geslaap het.
Polisiebeamptes is nou besig om die aanval met verskeie ander seksuele aanvalle, wat sedert einde Junie op kampeerterreine in die streek plaasgevind het, te verbind, het polisiebronne gesê.
So veel as sewe meisies, tussen die ouderdomme van sewe en 12, is in die laaste ses weke in die omgewing aangeval.
Die bestuurder van die kampeerterrein waar die jongste aanval plaasgevind het, wou nie Vrydag met ‘n verslaggewer van AFP praat nie, maar eienaars van ander terreine in die omgewing het bevestig dat hulle veiligheidsmaatreëls in plek gestel het om verdere aanvalle te voorkom.
Dit sluit in die ontplooiing van wagte gedurende die aand asook almal wat in die kampeerterrein bly moet armbande dra wat dit makliker maak om te verseker dat slegs geregistreerde gaste toegang tot die kampeerterrein het.
‘n Kunstenaar se beeld van die vermeende verkragter, ‘n man in sy 40’s, is na polisiemagte in die streek versprei maar dit is nog nie aan die publiek beskikbaar gestel nie.
Volg Nuus24 op Twitter
- AFP
