Polisie dreig om lesbiese paartjie te onthoof
2011-08-25 15:58
Banda Aceh – Godsdienstige polisielede in Indonesië sê hulle het ‘n lesbiese paartjie gedwing om te skei en hulle onder toesig geplaas.
Die polisie het dié stappe geneem, alhoewel homoseksualiteit wettig in dié land – wat hoofsaaklik deur Moslems bewoon word – is.
Die Islamitiese polisiemag in die Aceh-provinsie op die noordelike deel van Sumatra het die paartjie gewaarsku dat hulle onthoof kan word.
Die polisie het dié waarskuwing gemaak voordat hulle die paartjie met geweld gedwing het om te skei.
“Ons het vir hulle gesê hulle moet onthoof en verbrand word... hul as moet in die see gegooi word...” het die polisiehoof, wat net as Muddatsir bekend staan, gesê.
“Volgens ons godsdiens mag ons hulle doodmaak,” het hy bygevoeg.
Hy sê die paartjie, wat as Ranto (26) en Nuraini (18) bekend staan, woon nou in aparte dorpe wat sowat 36 km van mekaar geleë is.
Die polisiehoof sê Ranto en Nuraini word nou fyn dopgehou.
Die voorsitter van ‘n dorp het destyds ‘n nie-amptelike godsdienstige huwelikskontrak vir die paartjie gegee nadat die voorsitter gedink het dat Ranto ‘n man is, het Muddatsir vertel.
“Dis ‘n skade wat hulle gedoen het. Selfs diere soek vir die teenoorgestelde geslag,” het die polisiehoof gesê.
Volg Nuus24 op Twitter.
- Sapa - AFP