Pole: Dodetal styg tot 62
2012-02-06 15:00
Warskou, Pole – Europa se snerpende koue het reeds die lewe van 62 mense in Pole geëis – en nege die afgelope 24 uur, het die polisie Maandag gesê.
Temperature het oornag in sommige dele van die land tot -24°C gedaal.
Die meerderheid van die slagoffers was haweloos of dronk.
In 'n poging om lewens te red het skuilings in Pole 'n verbod wat bepaal dat hawelose mense wat dronk is nie toegelaat mag word nie, hersien.
Altesaam 107 mense het weens hipotermie in Pole gesterf sedert die winter verlede jaar in November aangebreek het.
Die huidige koue weerstoestande het teen die einde van Januarie begin.
In Litaue, waar die temperature tot -31°C gedaal het, is die dood van ses mense oor die naweek aangemeld. Dít het die dodetal op 17 te staan gebring.
In die Tsjeggiese Republiek het die polisie 'n hawelose man gevind. Sy dood het dié land se dodetal tot 18 laat styg.
– Volg Nuus24 op Twitter.
- Sapa - AFP