Poespas ontstaan weens 'Muff Road'
2010-01-15 12:10
Wellington – Die straatteken vir 'Muff Road', 'n straat in die rustige dorpie Orari op Nieu-Seeland se Suid-Eiland, is al soveel kere gesteel dat plaaslike owerhede oorweeg om die straatnaam te laat verander.
“Daar is soveel studente hier met 'n ‘Muff’-teken bo hul bed wat in die rigting van die middel van die bed wys,” het Pete Muff, na wie se familie die straat vernoem is, gesê.
Die stadsraad is so moeg daarvoor om herhaaldelik 'n nuwe teken op te sit dat dit vir die afgelope twee jaar nie vervang is nie.
Voorstelle van inwoners om die straatnaam na ‘n tradisionele Maori naam te verander, is ook oorweeg.
Maar die gesin na wie die straat vernoem is, wil die naam laat behoue bly. Samantha Muff (11) het reeds meer as 1 000 handtekeninge op ‘n petisie teen die verandering van die naam, ontvang.
Die stadsraad het besluit om dié naam nog ‘n kans te gee en die impak daarvan te probeer verminder deur bordjies met ander inligting op die naambord, soos die afstand na ander plekke, te sit.
Die nuwe bordjies sal ook redelik hoog op pale gehang word om diefstal te verminder.
“Die idee is om dit nie so aantreklik vir mense te maak om te steel nie, maar waar daar ‘n wil is, is daar ‘n weg,” het Pete Muff gesê.
- Sapa