Piers Morgan vaar uit oor media-skandaal
2011-07-20 11:04
New York – Piers Morgan, aanbieder van die geselsprogram Piers Morgan Tonight op CNN, het bewerings ontken dat hy betrokke was by die Britse media-skandaal toe hy as joernalis in Brittanje gewerk het.
Morgan was tussen 1994 en 1995 aangestel as redakteur van Brittanje se grootste naweek-poniekoerant, News of the World.
Hy het gereageer op die bewerings wat deur Louise Mensch, ‘n Britse parlementslid, gemaak is.
Mensch het Dinsdag aangedui dat Morgan in sy outobiografie The Insider: The Private Diaries of a Scandalous Decade, wat in 2005 verskyn het, noem dat foonboodskappe afgeluister is om stories te kry.
Sy het dié stelling gemaak terwyl die media-magnaat Rupert Murdoch voor ‘n parlementêre komitee in Londen verskyn het.
Morgan het op die sosiale netwerk Twitter gesê Mensch se bewering is “absoluut nonsens.”
Morgan spog nie in sy boek dat hy fone afgeluister het nie, maar hy skryf hy het vermoed dat hy self afgeluister is.
“Me. Mensch is heeltemal verkeerd,” het Morgan getweet. “Dis duidelik dat sy nog nie my boek gelees het nie. Kan iemand asseblief ‘n kopie vir haar gee?”
Morgan het ook Murdoch, wat sy vorige baas was, verdedig en gesê hy vind dit ondenkbaar dat Murdoch sou geweet het van die onwettige bedrywighede by sy koerante.
Murdoch, sy seun James en Rebekha Brooks, hoof- uitvoerende beampte van News International – die Britse afdeling van Murdoch se mediagroep News Corp. en moedermaatskappy van News of the World – het Dinsdag voor die parlementêre komitee verskyn.
Dit was die eerste keer wat die media-magnaat in die openbaar besonderhede oor die skandaal bespreek het.
News of the World, wat meer as twee weke gelede gesluit het, word daarvan aangekla dat die poniekoerant sedert 2000 sowat 4 000 mense, waaronder politici, bekendes en misdaadslagoffers, se stemposboodskappe afgeluister het.
Volg Nuus24 op Twitter.
- Sapa - AP