Petisie oor vermiste Maddie
2010-11-04 11:02
Londen – Die ouers van Madeleine McCann – die kleuter wat op driejarige ouderdom in Mei 2007 tydens ’n familievakansie in Portugal verdwyn het – het Woensdag daarop aangedring dat die saak oor hul dogter hersien word.
Kate en Gerry McCann het gesê hulle is moeg vir regeringsamptenare se “wollerige, niksseggende woorde”. Die ouerpaar het gesê nie die Britse regering óf die Portugese regering doen genoeg om Madeleine, wat uit ’n vakansiewoonstel verdwyn het, te probeer vind nie.
Die publiek dink die twee regerings soek nog na haar, het mnr. McCann aan die Londense poniekoerant The Sun gesê. Die amptelike ondersoek is in Julie 2008 laat vaar.
Die egpaar het vandeesweek ’n aanlynpetisie begin om die saak te laat heropen. Die Britse regering se reaksie is “al die moontlike word steeds gedoen” om haar te vind.
- Reuters