Papoea-Nieu-Guinee: Oud-bevelvoerder kaap weermag
2012-01-26 11:02
Port Moresby – ‘n Afgetrede militêre bevelvoerder in Papoea-Nieu-Guinee het Donderdag gesê hy het beheer oor die land se weermag geneem en eis dat Michael Somare, die voormalige premier, heraangestel word.
Oud-kol. Yaura Sasa het ‘n nuuskonferensie by die militêre hoofkwartiere in Port Moresby, die hoofstad, gehou om homself as die leier van die weermag te verklaar. Die aksies word in die media as ‘n “muitery” beskryf.
“My taak is om die integriteit en respek van die grondwet en die regstelsel te herstel,” het Sasa aan verslaggewers gesê.
“Ek doen nou ‘n beroep op die staatshoof om dadelik die hooggeregshof se besluit oor Michael Somare se posisie as premier te implementeer.”
Sasa het geëis dat Peter O’Neill, huidige premier, die parlement moet herroep en ‘n spertyd van sewe dae aan alle parlementslede gee om Somare as die premier te heraanstel.
“Ek kan nie toelaat dat die situasie so voortgaan nie. As daar nie gedoen word soos ek vra nie, sal ek gedwing word om stappe te neem om die integriteit van die grondwet te beskerm.”
Sasa wou nie sê watter stappe hy sal neem nie.
– Volg Nuus24 op Twitter.
- Sapa - AFP