Pakistan-vloede raak 600 000 mense
2012-09-17 17:31
Islamabad – Owerhede in Pakistan het Maandag gesukkel om verligting te bring aan meer as 600 000 mense wat deur vloede en stortreën in Baluchistan, in die suidweste van die land, geraak word, het beamptes gesê.
Attaullah Mengal van die provinsiale rampbestuur het gesê die Naseerabad- en Jaffarabad-distrikte is die ergste deur die swaar reën geraak wat verlede week begin het.
"Meer as 100 000 mense is steeds in die Sohbatpur-omgewing van Jaffarabad vasgekeer,” het Mengal gesê.
"Ons probeer om meer as 600 000 mense te bereik wat direk en indirek deur die vloede geraak is."
Hy het gesê 57 mense het in die provinsie gesterf.
Ander omgewings wat deur die vloede geraak word, sluit in Sibi, Jhal Magsi, Kachi, Dera Murad Jamali, Dera Allahyar, Manjopur en Manjoshori, het hy gesê.
Die provinsiale regering het ook die weermag se hulp ingeroep om te help om mense na plekke van veiligheid te skuif en ook kospakkies aan diegene wat afgesonder is, te gee.
Die weerburo het owerhede gewaarsku om gereed te maak vir nog reën oor die hele land.
– Volg Nuus24 op Twitter.
- Sapa-DPA
