Pakistan: 24 dood in bomontploffings
2010-04-19 23:16
Peshawar, Pakistan – Vier-en-twintig mense, insluitend ‘n kind en polisiebeamptes, is Maandag ure na mekaar in bomontploffings dood by ‘n hoërskool en ‘n stampvol mark in die stad Peshawar in Pakistan, het beamptes gesê.
Die aanvalle het die aantal mense wat al in die noordweste van Pakistan in bomontploffings gesterf het op 73 gebring. Dít kom slegs drie dae nadat selfmoordaanvalle deur Taliban-militante 49 mense se lewens geëis het in die dorp Kohat.
“Drie-en-twintig mense is dood insluitend drie polisiebeamptes. Ongeveer 27 mense is in die hospitaal opgeneem,” het Imram Kishwar, ‘n senior polisiebeampte gesê.
‘n Selfmoordbomaanvaller het met ses tot agt kilogram plofstof by ‘n mark vol mense in Peshawar ingeloop.
Slegs ‘n paar uur later is ‘n agtjarige seun dood en ten minste tien mense beseer in ‘n tweede bomontploffing in Peshawar. ‘n Ploftoestel was naby ‘n winkel geplant, het Mohammad Khan, ‘n senior polisiebeampte gesê.
"Skoolkinders was geteiken.”
- Sapa-AFP