Paartjie vas ná agt baba-lyke gevind is
2010-07-29 05:47
Douai, Frankryk – Franse polisie het ‘n paartjie in hegtenis geneem nadat die lyke van agt pasgebore babas in ‘n huis en die tuin van ‘n ander huis gevind is, het amptenare Woensdag gesê.
Polisie het die soektog in Villers-au-Tertre met polisiehonde voortgesit nadat die paartjie, beide in hul veertigs, Dinsdag in hegtenis geneem is.
Volgens die bure het die nuwe eienaars van ‘n huis in die dorp die polisie gekontak nadat hulle kinderbene in die tuin van hul nuwe huis gevind het.
Polisie-ondersoeke het hulle na nog ‘n huis sowat ‘n kilometer weg gelei waar nog baba-lyke gevind is, het die bure gesê.
Die vervolgingskantoor in die nabygeleë Douai sal Donderdag ‘n regterlike ondersoek loods wat na verwagting daartoe sal lei dat die paartjie aangekla sal word, het ‘n bron gesê.
Volg Nuus24 op Twitter
- Sapa - AFP