Paartjie tronk toe ná baba se hongerdood

2012-06-15 07:30

Taipei – 'n Taiwannese paartjie is tot sewe en 'n half jaar tronkstraf gevonnis nadat hul kind weens honger gesterf het terwyl hulle daagliks ure lank aanlynspeletjies gespeel het, berig die plaaslike media.

Wang Hui-huang (23) en sy vrou, Chu Miao-hsu (22) is vandeesweek deur die Taiwannese hooggeregshof gevonnis vir die dood van hul eenjarige dogter wat deur nalatigheid veroorsaak is.

Ondersoekbeamptes het bevind dat die paartjie daagliks vyf tot ses uur lank subskripsie-gebaseerde speletjies gespeel het toe hul dogtertjie in Februarie 2011 dood gevind is.

Die baba het ten tyde van haar dood 3,25 kg – minder as die helfte van die gemiddelde gewig vir haar ouderdom – geweeg, berig die Apple Daily.

Die paartjie het beweer hulle het nie geweet hoe om na die kind om te sien nie, en is gedwing om die baba ryswater te voer omdat hulle nie formulemelk kon bekostig nie.

Wang het as 'n opsigter gewerk en het maandeliks NT$10 000 (sowat R2 800) verdien.

'n Laer hof het die paartjie tot vyf jaar en vier maande tronkstraf gevonnis weens hul ouderdom en finansiële situasie. Die hooggeregshof het dié beslissing omgekeer.

Die regter het gesê die paartjie se gedrag om vir videospeletjies te betaal is 'n duidelike voorbeeld van nalatigheid. Die hooggeregshof het toe hul vonnis verander.
      
– Volg Nuus24 op Twitter

- Sapa-DPA