Oupa, kleinkind verdrink in Portugal
2012-08-21 22:56
Lissabon – ‘n Britse man en sy vyfjarige kleindogter het Dinsdag verdrink tydens ‘n besoek aan ‘n strand in Portugal wat bekend is vir sy groot branders, het ‘n plaaslike beampte van die hawe gesê.
Die meisie en haar ouma en oupa, wie se identiteite nie bekendgemaak is nie, “het by ‘n deel van Salgado-strand wat nie gemonitor word nie gestap” toe hulle “waarskynlik deur die branders vasgekeer is,” het Antonio Jose de Albuquerque, hoof van die Nazare-hawe, aan AFP gesê.
Vissermanne wat in die omgewing was het gesien hoe die drie teen die branders probeer baklei en het hulle uit die water gered voordat hulle hulp ontbied het.
“Die ouma kon gered word, maar die oupa was reeds dood. Die eerste hulpwerkers het vir byna ‘n uur tevergeefs probeer om die meisie by te bring,” het hy gesê.
Die ouma is na ‘n hospitaal geneem en is glo buite gevaar.
Die strand is tussen die vissersdorp Nazare en die dorp Sao Martinho do Porto geleë, sowat 100 km noord van Lissabon.
Die oorlede man was glo 66 jaar oud.
– Volg Nuus24 op Twitter
- Sapa - AFP
