Ouers skuldig aan eremoord op dogter

2012-08-03 17:44

Londen – ‘n Britse hof het die ouers van ‘n tienerdogter skuldig bevind aan ‘n sogenaamde eremoord.

Die Chester Crown hof het bevind dat Iftikhar en Frazana Ahmed, albei oorspronklik vanaf Pakistan, hulle 17-jarige dogter Shafilea in 2003 versmoor het

Gedurende die hofsaak het Shafilea se suster, Alesha, die jurie vertel dat haar ouers vir Shafilea op die bank gestoot het.

Haar ma het toe gesê dat “hulle dit net hier moet klaar maak” voordat hulle ‘n plastieksak in haar mond gedruk het.

Sy het bygevoeg dat haar ouers gedink het Shalifea is te westers. Alesha was glo ook nie ten gunste van ‘n beplande huwelik nie.

Die polisie het verlede jaar honderde sake van beplande huwelike ondersoek.

Die hoogste persentasie van beplande huwelike kom uit die Moslem-gemeenskap.

Brittanje is die tuiste van sowat 1,8 miljoen Moslems.

– Volg Nuus24 op Twitter
 

- AP