Oudste dialek in wêreld sterf uit
2010-02-08 04:14
Port Blair, Indië – Een van die wêreld se oudste dialekte, wat tienduisende jare gelede vir die eerste keer gepraat is, het uitgesterf nadat die laaste persoon wat dit kan praat, dood is.
Boa Sr (85) was die laaste persoon wat “Bo” kon praat en ook die oudste lid van die Andamanse-stam.
Sy is verlede week in Port Blair, die hoofstad van die Andaman- en Nicobar-eilande dood. Saam met haar het ook een van die oudste dialekte in die wêreld uitgesterf.
“Met haar dood en die uitsterwing van die Bo-dialek is ‘n unieke deel van die menslike samelewing ook nou net ‘n herinnering,” het Stephen Corry, direkteur van Survival International, ‘n organisasie wat wêreldwyd stamme beskerm en ondersteun, gesê.
Volgens Corry moet Boa se dood en die uitsterwe van Bo die samelewing herinner om te verhoed dat dieselfde met ander stamme van die Andaman-eilande gebeur.
- Reuters