Oud-polisieman gesoek ná moorde
2013-02-08 08:57
Los Angeles – ‘n Soektog was Donderdag onderweg na ‘n voormalige polisiebeampte van Los Angeles ná twee moorde oor die naweek en ‘n skietery vroeër in die week waarin een beampte dood en ‘n ander kritiek beseer is.
Beamptes het Christopher Jordan Dorner as “gewapen en gevaarlik” beskryf, en het gesê hulle het ‘n dokument gevind waarin hy dreig om van sy voormalige kollegas te teiken.
Dorner is in 2008 uit die polisiedepartement afgedank.
Een van die naweek se slagoffers was die dogter van ‘n voormalige polisiekaptein wat hom tydens sy tugverhoor verteenwoordig het.
Sers. Ray Battrick van die San Diego-polisie sê Dorner se ID- en polisie-identifikasie is naby die stad se lughawe gevind en aan die polisie oorhandig.
Dorner het op twee beamptes van die Los Angeles-polisiedepartement geskiet en een van hulle gewond, het beamptes gesê. Hy het by ‘n ander ligging op twee polisiebeamptes geskiet. Een van hulle is in die aanval dood, terwyl die ander een kritiek gewond is.
In daardie tyd was die polisie nie aktief op soek na hom nie.
Dorner word ook gesoek vir die moorde op Monica Quan en haar verloofde, Keith Lawrence, wie se lyke Sondagaand in hul motor gevind is, het David L Maggard, polisiehoof van Irvine, Woensdagaand gesê.
Quan (28) was ‘n assistent-basketbalafrigter vir vroue by ‘n plaaslike universiteit. Lawrence (27) was ‘n openbare veiligheidsbeampte by die Universiteit van Suid-Kalifornië.
“Ons het rede om te glo Dorner is gewapen en gevaarlik,” het Maggard gesê. Hy het bygevoeg dat die polisie en FBI saam aan die saak werk.
– Volg Nuus24 op Twitter
- AP
