Oslo-skieter wil op TV wees
2012-01-31 22:09
Oslo – Die gewapende man wat 77 mense se dood in twee aanvalle in Noorweë veroorsaak het, wil hê ‘n buitelandse televisiekanaal moet ‘n onderhoud met hom voer, het sy regsverteenwoordiger gesê.
Geir Lippestad het aan die Noorse poniekoerant Verdens Gang (VG) gesê Anders Behring Breivik wil die onderhoud hou voordat sy verhoor in April begin.
Luidens die berig het Lippestad sy kliënt aangeraai om nie met die media te praat nie, aangesien “dit nie wys is om voor die verhoor iets te sê nie.”
“Maar Breivik hou vol dat ‘n buitelandse televisiekanaal ‘n onderhou met hom moet voer,” het Lippestad gesê.
Die 32-jarige regse ekstremis het sedert die dodelike aanvalle in Julie 2011 nie met die media gepraat nie.
Talle Noorse en buitelandse mediabronne het gesê hulle stel daarin belang om ‘n onderhoud met Breivik in die Ila-tronk naby Oslo te voer.
Breivik het erken dat hy op 22 Julie verlede jaar 77 mense in ‘n skietvoorval en bomaanval gedood het, maar het skuld op dié dade ontken.
Volg Nuus24 op Twitter
- AFP