Osama het beampte omgekoop om skuiling te bou

2012-12-26 15:00

Islamabad – Die Al-Kaïda-leier Osama bin Laden het 'n Pakistanse registrateur omgekoop sodat die bouwerk van sy skuiling kom voortgaan, is Woensdag berig.

Bin Laden is verlede jaar deur Amerikaanse spesialismagte doodgeskiet.

Dagboekinskrywings van Bin Laden het melding gemaak van die betaling, berig The News.

Die regeringsamptenaar het omkoopgeld van $515 (sowat R4 400) aanvaar om 'n permit vir die skuiling in die noordelike dorp van Abbottabad goed te keur.

Volgens die koerant is die dagboek nou in die besit van Pakistanse owerhede. Die dagboek is in Bin Laden se skuiling gevind nadat Amerikaanse troepe beslag gelê het op duisende dokumente, rekenaarskyfies en ander materiaal tydens die klopjag waartydens hy in Mei 2011 dood is.

Die berig het nie die regeringsamptenaar se naam bekend gemaak nie, maar het gesê hy is ondervra.

Bin Laden was volgens die berig "goed bewus" van die beweerde korrupsie in Pakistan se grond-rekordstelsel en die omkoopgeld is met sy toestemming gegee.

Die regering het eienaarskap van die grond oorgeneem en die huis is vanjaar gesloop te midde van bewerings dat Al-Kaïda-simpatiseerders die gebou as 'n heiligdom kan beskou.

– Volg Nuus24 op Twitter

- SAPA