Orkaan Sandy saai verwoesting

2012-10-25 12:13

Washington – Twee mense is dood ná orkaan Sandy Donderdag Santiago de Cuba in suidwestelike Kuba getref het, het beamptes gesê.

'n Vrou is dood nadat sy Woensdag in die westelike Haïtiaanse dorp van Camp Perrin meegesleur is toe sy probeer het om 'n oorvol rivier oor te steek, het owerhede aan die nasionale media gesê.

In Jamaika is 'n 74-jarige man dood nadat 'n grondstorting veroorsaak het dat 'n rots op sy huis val.

Die storm het ook huise se dakke afgeruk en bome in die gebied ontwortel.

Meer as 1 000 mense het na noodskuilings gevlug en nóg mense sal na verwagting voor die vloedwater vlug terwyl swaar reën in die gebied voortduur, het die rampbestuursentrum aan die koerant gesê.
     
– Volg Nuus24 op Twitter

- Sapa-DPA