Oproer in Londen sal nie Spele beïnvloed
2011-08-08 17:33
Londen – Britse regeringsamptenare het betogers in Londen
wat winkels geplunder en geboue en voertuie aan die brand gesteek het as
opportunistiese misdadigers beskryf en gesê die geweld wat tans in Londen woed
sal nie voorbereidings vir volgende jaar se Olimpiese Spele beïnvloed nie.
Die polisie het die naweek meer as 160 mense in Londen in
hegtenis geneem ná die chaos wat in die multi-etniese, laer-inkomste buurt van
Tottenham, enkele kilometers van waar die Olimpiese park voorberei word,
begin het.
“Dit was onnodige, opportunistiese diefstal en geweld. Niks
meer nie en niks minder nie. Dit was heeltemal onaanvaarbaar,” het die Britse adjunk-premier,
Nick Clegg, gesê.
Boris Johnson, Londen se burgemeester, het gesê hy hoop die
stad “het ‘n fantastiese Olimpiese Spele ten spyte van wat gebeur
het”.
Volgens regeringsbronne het Theresa May, minister van
binnelandse sake, haar vakansie kortgeknip om na Londen terug te keer vir
vergaderings met polisiebeamptes.
Nege polisiebeamptes is beseer in wat die polisie as “na-aap-misdade”
beskryf het.
– Volg Nuus24 op Twitter.
- Reuters