Opposisie staan saam in Sirië

2012-11-11 14:59

Londen – Siriese opposisiegroepe wat in Katar vergader, het besluit om 'n nuwe koalisie te vorm om pres. Bashar al-Assad se regering teen te staan, het die BBC Sondag berig.

Een Islamitiese afgevaardigde het gesê 'n nuwe leier en onderleier sal Sondagaand gekies word.

Die Siriese opposisie was die laaste paar maande onder druk van die VSA en ander moondhede om 'n samewerkingsooreenkoms te onderteken.

Meer as 36 000 mense is al dood in die Siriese opstande, en duisende meer het uit die land gevlug.

"'n Aanvanklike ooreenkoms is onderteken. Ons sal in die aandsessie 'n nuwe president en onderleier vir die liggaam kies," het Ali Sadreddine al-Bayanouni, 'n lid van die Moslem-broederbond, wat by die samesprekings teenwoordig is, gesê.

Opposisiegroepe vergader die laaste week in Doha, Katar.

– Lees hier meer.

– Volg Nuus24 op Twitter.