Onrus in Thailand versprei
2010-04-22 04:11
Bangkok – Onrus wat gepaard gaan met politieke onstabiliteit in Thailand het Woensdag van Bangkok na die noord-ooste van die land versprei toe betogers 'n trein wat militêre voertuie vervoer het, verhoed het om verder te beweeg.
Volgens betogers sou dié voertuie gebruik word om mede-betogers in die hoofstad te onderdruk.
Intussen is sogenaamde Rooi Hemp-betogers en sekuriteitsmagte gewikkel in 'n potensieel plofbare stryd in die middestad van Bangkok.
Betogers eis dat Abhisit Vejjajiva, Thailand se premier, die land se parlement ontbind en 'n verkiesing uitroep.
Op die 10de April het 'n mislukte poging van sekuriteitsmagte om betogers te verjaag gelei tot een van die ergste voorvalle van politieke geweld in Thailand in 18 jaar, waartydens 25 mense dood en meer as 800 beseer is.
- Sapa - AP