Onmin oor Chavez se inhuldiging

2013-01-07 10:33

Caracas – ‘n Top-opposisieleier in Venezuela het Sondag gevra dat landsburgers protes moet aanteken as die regering voortgaan met planne om die inhuldiging van pres. Hugo Chavez uit te stel.

Julio Borges van die Justice First-party het sy voorneme uitgespreek om klagtes by verskeie internasionale organisasies in te dien as die inhuldiging nie op 10 Januarie plaasvind nie.

“Mense moet hulle gereed maak om te betoog teen wat ‘n mislukking gaan wees om die grondwet te handhaaf,” het Borges gesê.

Chavez is op 7 Oktober as president herkies ten spyte van sy stryd teen kanker.

Hy het sedertdien ‘n operasie in Kuba ondergaan en het volgens die regering ‘n ernstige longinfeksie opgedoen.

Nicolas Maduro, adjunkpresident van Venezuela, het intussen gesê die inhuldiging is net ‘n formaliteit, en dat dit uitgestel kan word sonder dat Chavez sy mag hoef op te gee.

– Volg Nuus24 op Twitter.

- Sapa - AFP