Onderwyseres tronk toe oor seks met leerder

2012-10-29 15:11

Singapoer – 'n 32-jarige onderwyseres van Singapoer is Maandag tot 'n jaar tronkstraf gevonnis nadat sy seks gehad het met 'n 15-jarige leerder, het die plaaslike media berig.

Die onderwyseres, wat 'n getroude ma van twee kinders was, het verlede jaar haar verhouding met die tiener begin nadat hy berading by haar ontvang het, het die Straits Times-koerant berig.

Die hof het gehoor hoe sy geskenke vir die seun gekoop het.

Die twee se verhouding was al 'n maand aan die gang, waartydens hulle seks gehad het by die onderwyseres se woonstel, voor die seun se ouers uitgevind het van die verhouding en haar by die skool gerapporteer het.

Distrikregter Eugene Teo het in sy uitspraak gewaarsku dat diegene wat skole beskou as 'n aanvaarbare plek vir dié soort gedrag, gestraf sal word.

Ingevolge wetgewing in Singapoer kan 'n volwassene wat seks het met enigeen onder die ouderdom van 16, tot 10 jaar tronkstraf gevonnis word of 'n boete opgelê word.

– Volg Nuus24 op Twitter

- AFP