Onderwyser molesteer glo 20 kinders
2013-01-24 10:27
Los Angeles – ‘n Laerskoolonderwyser wat vir amper vier dekades in die Los Angeles-skoolstreek gewerk het, is in hegtenis geneem ná hy na bewering 20 leerders gemolesteer en een volwassene seksueel aangerand het, het die polisie gesê.
Agt aanklagte van voortdurende seksuele mishandeling en sewe aanklagte van onsedelike dade met ‘n kind is ná 'n ondersoek van 10 maande teen Robert Pimentel van Newport Beach aanhangig gemaak.
Die voorvalle het by die George De La Torre-laerskool in die Wilmington-gebied plaasgevind, het ‘n polisiebeampte, Christopher No, aan die Associated Press gesê.
Behalwe vir die 15 aanklagte word aanklagte van wangedrag vir die res van die voorvalle ook verwag, het No gesê.
Sy borgtog is op $12 miljoen (R108 miljoen) vasgestel.
Pimentel (57) het sy pos as onderwyser verlede Maart ontruim toe verskeie meisies aan hul ouers gesê het hy het op onvanpaste maniere aan hulle gevat tydens skoolure. Die polisie het daarna met ‘n ondersoek begin.
Streeksbeamptes het hom onmiddellik van die kampus verwyder en ouers is in kennis gestel, het die skool se woordvoerder, Daryl Strickland, gesê.
Rekords van die hof toon dat die aantygings ‘n tydperk tussen September 2011 en Maart 2012 dek.
– Volg Nuus24 op Twitter
- Sapa - AP
