Ondersoek begin na helikopterongeluk
2013-01-16 15:41
Londen – Twee mense is dood en 13 is beseer, waarvan een kritiek is, in die helikopterongeluk wat Londen Woensdag geruk het.
Die helikopter, wat glo onderweg was na Elstree, Hertfordshire en toe die hyskraan in Sentraal-Londen getref het, het net die vlieënier aan boord gehad.
Amptenare beweer dat die vlieënier in die mistige toestande gesukkel het om te sien hoe ver hy van die hyskraan was.
Die helikopter het naby die Vauxhall-treinstasie en die hoofkwartier van die Britse intelligensiediens, MI6, neergestort.
Twee motors is glo deur die helikopter getref toe dit neergestort het.
Londen se brandweerdiens het intussen bekend gemaak dat daar meer as 80 brandweerlede en polisiebeamptes na die ongeluk op die toneel was.
Ses van die 13 beseerdes is na 'n hospitaal geneem vir behandeling, terwyl die ander sewe op die toneel behandel is.
Ooggetuies beweer dat die helikopter heen en weer geskud het voor dit die hyskraan getref het, het die Daily Mail berig.
Na die ongeluk kon mens op beeldmateriaal sien hoe die gebied waar die helikopter neergestort het, brand.
Intussen het premier David Cameron sy medelye betuig aan die slagoffers van die ongeluk.
“Die premier is baie hartseer oor die sterftes en die beserings van hierdie tragiese voorval,” het Cameron se woordvoerder tydens ‘n mediakonferensie gesê.
Die Air Accidents Investigation Branch (AAIB) het ook ‘n ondersoek na die ongeluk begin.
Daar sal ondermeer gekyk word of die regte roete gevolg is, en of die toestande geskik was om te vlieg.
– Volg Nuus24 op Twitter
