Omroeper in trane ná verpleegster se selfmoord

2012-12-10 09:45

Sydney – Een van die Australiese radio-omroepers wat die fopoproep na ‘n hospitaal in Londen gemaak waar Prins William se vrou Catherine behandel was, was Maandag in trane toe sy in 'n onderhoud gepraat het oor die verpleegster wat glo selfmoord in verband met die voorval gepleeg het.

Mel Greig van Sydney se 2Day FM het in haar eerste openbare verskyning sedert die verpleegster se selfmoord Vrydag in 'n televisie-onderhoud gesê sy kan nie ophou om aan die selfmoord te dink nie.

“Ek onthou my eerste vraag was of sy ‘n ma was. Ek hoop regtig dat hulle oukei is, ek hoop regtig so,” het die omroeper oor die familie van Jacintha Saldanha gesê.

Saldanha, 'n ma van twee, het die telefoon geantwoord toe die omroepers, Greig en Michael Christian, die stem van Koningin Elizabeth II en Prins Charles nagemaak het. Saldanha het die telefoon aan 'n kollega gegee, wat die inligting oor Catherine se gesondheid aan hulle verskaf het.

Saldanha se lyk is Vrydag gevind en die polisie het gesê haar dood word nie as verdag beskou nie. Die hospitaal weier om kommentaar te lewer op mediaberigte dat sy selfmoord gepleeg het.

– Volg Nuus24 op Twitter

- Sapa - AFP