Olieramp vererger nadat Operasie Top Kill misluk
2010-05-31 07:35
Johannesburg – BP se poging om die oopgeboorde gat in die Golf van Mexiko met 30 000 vate “swaar modder” toe te stop, het misluk.
Top Kill, soos die operasie bekend staan, het tot dusver misluk, het die petroleumreus die naweek in ’n verklaring gesê.
BP gaan nou ander gate in die seebodem boor in ’n poging om die olie dáár uit te pomp.
Dié oliereus hoop om dieselfde put raak te boor as dié waaruit olie reeds 41 dae onbeheersd in die Golf van Mexiko stroom.
Die petroleumreus het die afgelope naweek 30 000 vate modder, waarin gholfballe, stukkende motorbande en ander “swaar materiaal” met modder gemeng is, in die gat afgepomp om dit te probeer toemaak.
Die plan was om dit dan met ’n prop van sement af te seël.
“Die operasie was ongelukkig ’n mislukking. Ons het tot 80 vate swaar modder per minuut in die gat ingepomp, maar die olie kom steeds uit. Die modder kon nie weerstand bied teen die krag waarmee die olie na bo kom nie,” lui die verklaring.
Intussen raak die kritiek teen pres. Barack Obama van die VSA al feller oor sy oënskynlike verdraagsaamheid teenoor BP én omdat die regering nie ingryp om te keer dat die ekologiese ramp vererger nie.
Obama het die naweek tydens sy tweede besoek aan die rampgebied herhaal BP is die skuldige en dat die petroleummaatskappy ál die blaam vir die grootste olieramp in die Amerikaanse geskiedenis moet dra.
Hy het die inwoners van die gebied Saterdag die versekering gegee dat hy die druk op BP sal volhou en dat die petroleumreus die skade aan “hul lewens en die omgewing” móét herstel.
Obama het vroeër gesê hy kan nie ingryp nie omdat sy regering geen wetenskaplikes het wat kennis van tegnologie in die diepsee het nie.
“Net so woedend soos wat dit ’n mens maak, so breek dit ook jou hart en ons sal nie rus nie voordat hierdie olielek toegestop en die see en kus skoongemaak is .”
Hy het bygevoeg die mense in die Golf van Mexiko was ongelukkige slagoffers van ’n mensgemaakte ramp en dat hul lewe deur BP “heelgemaak moet word”.
BP het luidens die verklaring gesê sy bykomende boorwerk sal moontlik eers teen einde Julie voltooi wees.
Bewaringsorganisasies is woedend vir BP oor die olielek, die gemors wat hy in die see pomp, asook die chemikalieë wat hy in die rehabilitasieprojek gebruik.
Hulle beskuldig BP nou ook daarvan dat sy 22 000 werkers wat met Top Kill help, nie behoorlik opgelei is nie en siek word van die olie.
BP se se Deepwater Horizon olieboor het op 20 April ontplof. Elf mense is in die ontploffing dood.
BP het na raming reeds meer as R2,7 miljard aan die herwinning van die olie en die rehabilitasie van die omgewing bestee.