Occupy Wall Street: Betogers landswyd vasgetrek

2011-10-17 17:55

New York – Die polisie het betogers in talle stede oor die VSA heen in hegtenis geneem terwyl protesoptogte Sondag vir die 30ste dag voortgeduur het, het CNN berig.

Volgens ‘n woordvoerder is 19 mense in Washington D.C. vasgetrek.

Die New Yorkse owerhede het 14 mense in aanhouding geneem nadat hulle ‘n aandklokreël oortree het.

Talle mense is ook vroeg Sondagoggend in Chicago weens wanordelike gedrag in hegtenis geneem.

Daar word berig dat 78 mense Saterdag oor die hele land heen vasgetrek is.

Die beweging Occupy Wall Street het verlede maand in New York begin as ‘n teenreaksie op die ekonomie en die korporatiewe, finansiële en politieke elite.

Die beweging het sedertdien na ander groot stede in die VSA versprei.

Organiseerders sê hulle is deur die Arabiese opstande geïnspireer.

Lees meer hier

Volg Nuus24 op Twitter