Obama wen verkiesing – projeksies

2012-11-07 06:41

Barack Obama (Jewel Samad, AFP)

Washington – Amerikaanse televisienetwerke het 'n oorwinning vir pres. Barack Obama voorspel in die verkiesingstryd teen sy Republikeinse teenstander, Mitt Romney.

Obama het teen vroeg Woensdagoggend oorwinnings in 'n aantal sleutelstate agter sy naam gehad en projeksies het aangedui dat hy genoeg stemme in die kieskollege sou werf om sy tweede termyn as die VSA se president te dien.

CNN het pres. Barack Obama Woensdag omstreeks 06:20 Suid-Afrikaanse tyd as die wenner van die Amerikaanse presidentsverkiesing aangewys.

NBC en CBS se projeksies het ook getoon dat Obama die stryd gewen het.

Obama se grootste prestasies in sy eerste termyn sluit in die redding van die Amerikaanse motorvervaardigingsbedryf en die dood van Osama bin Laden.

Sy oorwinning beteken ook dat sy omstrede gesondheidsorgplan en wette vir finansiële hervorming wel geïmplementeer sal word.

– Volg Nuus24 op Twitter.

- Reuters