Obama vra miljarde vir oorlog
2010-02-02 08:45
Washington. – Die Amerikaanse president Barack Obama het gister nóg twee jaar van hoë besteding aan die oorlog in Irak en Afganistan voorgestel.
Hy het daarvoor die Kongres se goedkeuring vir nagenoeg $160 miljard (net meer as R1 210 miljard) vir vanjaar en weer in die boekjaar 2011 gevra.
Obama se voorgestelde besteding is net ’n klein bietjie minder as wat oudpres. Bush in elk van die laaste twee jaar van sy termyn bestee het.
In sy verkiesingsveldtog het Obama hom juis beywer vir die Withuis se beëindiging van die oorlog in Irak. Sy Demokratiese Party het ’n meerderheid in albei huise van die Kongres met ’n groot, liberale faksie wat gekant is teen die oorlog, en wat dus traag sal wees om meer geld aan die oorlog te bestee.
Hoewel Amerikaanse troepe veronderstel is om aan die einde van aanstaande jaar uit Irak te onttrek, beoog Obama om vanjaar meer troepe na Afganistan te stuur in die stryd teen Al-Kaïda en die Taliban.
Hy hoop egter om die troepe in die middel van aanstaande jaar uit Afganistan te begin onttrek.
Om hierdie militêre golf te stu, het Obama gister om $33 miljard (nagenoeg R250 miljard) vir die huidige boekjaar aansoek gedoen.
Dit vul die $130 miljard (nagenoeg R985 miljard) aan wat die Kongres reeds goedgekeur het.
–