Obama se groen-adviseur bedank
2009-09-06 09:19
Washington - President Barack Obama se spesiale adviseur vir omgewingskwessies het bedank onder druk van Republikeinse politici en onthullings oor kontroversiële stellings wat hy gemaak het, het die The Washington Post Sondag berig.
Van Jones, 'n voormalige menseregte-aktivis van Kalifornië, het sedert Maart vir die Withuis se Raad oor Omgewingsgelykheid gewerk.
"Ek bedank uit my pos by die Raad oor Omgewingsgelykheid, met onmiddellike effek," het die koerant hom aangehaal. Jones se verklaring is 5 September gedateer, maar dit is kort na middernag op Sondag 6 September vrygestel.
Jones sê verder dat opponente van hervorming, op die vooraand van historiese gevegte oor gesondheidsorg en skoon energie, 'n smeerveldtog teen hom begin het.
"Hulle gebruik leuens en verdraaiings om aandag af te lei en te verdeel. Maar ek het hierheen gekom om te veg vir ander, nie vir myself nie. Ek kan nie met 'n skoon gewete vir my kollegas vra om kosbare tyd en energie te gebruik om my verlede te verduidelik of verdedig nie. Ons het alle hande nodig om vir die toekoms te veg."
Jones was verlede week in die nuus nadat dit aan die lig gekom het dat hy 'n petisie geteken het wat bevraagteken of amptenare in die Bush-administrasie toegelaat het dat 9/11 gebeur as 'n aanleiding tot oorlog.
Jones het glo ook 'n kru-term gebruik om na Republikeine te verwys in 'n toespraak wat hy gegee het voor hy by die administrasie aangesluit het, berig die koerant.
- AFP