Obama moet miljarde gee om Aarde te red
2009-12-10 17:19
Kopenhagen – Ontwikkelende lande het Donderdag ‘n beroep gedoen op pres. Barack Obama om $200 miljard (R1.5 biljoen) in fondse beskikbaar te stel om klimaatsverandering te beveg.
Obama het Donderdag die Nobelprys vir vrede in ontvangs geneem.
"Dit is die uitdaging wat Obama in die gesig staar. Dit is wat van ‘n Nobelpryswenner verwag word,” het Lumumba Stanislas Dia-Ping van Soedan gesê.
Dia-Ping is die verteenwoordiger van die die Groep van 77 en China, 'n blok van 130 lande.
Dia-Ping het ook ‘n beroep op die VSA gedoen om te help om die sowat $200 miljard van die Internasionale Monetêre Fonds (IMF) los te maak sodat dit gebruik kan word om te help om klimaatverandering te bestry.
"Jy keur miljarde goed vir jou verdedigingsbegroting. Kan jy nie $200 miljard goedkeur om die wêreld te red nie?” het hy gevra.
Volgens Dia-Ping is dit wat verwag word van iemand wat deel van beide die ontwikkelende en ontwikkelde wêreld is.
“Lede van sy familie - sy broers, nefies en ooms - is steeds op dié kontinent (van Afrika),” het Dia-Ping gesê.
Hy het ‘n beroep op die VSA gedoen om na die Kioto-verdrag terug te keer, wat Washington in 1997 help ontwikkel het maar in 2001 verlaat het.
Todd Stern, Amerika se hoofonderhandelaar in Kopenhagen, het Woensdag ‘n terugkeer na die Kioto-verdrag verwerp.
"Ons sal nie weer deel van die Kioto-verdrag word nie. Dit is nie op die tafel nie,” het hy gesê.
- Sapa