Obama kyk self hoe olie uit boorgat in see lek
2010-05-03 08:22
Johannesburg – Te midde van toenemende vrese dat die olieramp in die Golf van Mexiko die grootste in die geskiedenis van die VSA kan word, het pres. Barack Obama gistermiddag self die gebied besoek om te kyk na die omvang van die ramp.
Duisende liters ruolie lek reeds langer as ’n week uit ’n ondersese olieboorgat ná ’n ontploffing op die Deepwater Horizon-olieplatform sowat twee weke gelede.
Die platform het ná die ontploffing begin brand en twee dae later gesink. Elf werkers is in die ontploffing dood.
Die verbindingspypleiding (van sowat 1,5 km) tussen die seebodem en die oppervlak is deur die ontploffing afgeruk en sedertdien lek die olie in die see.
Daar word geraam dat sowat 800 000 F ruolie per dag uit die boorgat lek.
Luidens ’n berig van Voice of America het Obama gister die gebied besoek om homself van toestande daar te vergewis en te verseker dat alles moontlik gedoen word om die kuslyn van Amerika teen die oliebesoedeling te beskerm.
Die olieplatform was sowat 50 km van die kus, met die gevolg dat die olielaag eers die naweek op dele van die kus begin uitspoel het.
Die vrees bestaan dat groot dele van die kus van Louisiana deur die olie besoedel kan raak, met gevolglike vrektes onder vis- en seelewe in die gebied.
Die gebied is sowat ses jaar gelede deur die orkaan Katrina verwoes en was net besig om te herstel van die ramp.
Verlede week is daar gepoog om van die olie op die oop see te laat uitbrand, maar onstuimige seetoestande het die pogings grotendeels in die wiele gery.
British Petroleum (BP), wat die olieplatform beheer het, het die naweek gesê hulle probeer alles in hul vermoë om die oliebesoedeling te voorkom.
Volgens Amerikaanse wetgewing moet die besoedelaar betaal vir die opruiming en skoonmaak van die besoedeling – wat in dié geval miljarde dollars gaan kos.
Indien planne om die boorgat met afstandbeheerde duikbote te verseël nie slaag nie, word daar gevrees dat die boorgat tot 90 dae lank kan lek voordat ’n nuwe boorgat langs die bestaande een geboor kan word om die vloei van olie te keer.
– Beeld