Obama fokus op ekonomie
2013-02-13 13:43
Washington – Die Amerikaanse president, Barack Obama, het Dinsdag in sy staatsrede die klem op binnelandse sake geplaas, en veral gefokus op planne om nuwe lewe in die Amerikaanse ekonomie te blaas, die moordsyfer af te bring en die immigrasiestelsel te hervorm.
Hy het slegs kortliks oor buitelandse krisisse gepraat, en die geleentheid gebruik om Noord-Korea se jongste kerntoets te veroordeel en oor Iran se kernprogram kommentaar te lewer. Hy het ook planne bekendgemaak om die helfte van die VSA se soldate in Afganistan binne ‘n jaar huis toe te bring, maar hy het benadruk dat die internasionale soektog na terreurverdagtes sal voortgaan.
Obama het die VSA se standvastigheid en vasberadenheid in moeilike ekonomiese tye geprys en het onderneem om die middelklas weer op te hef.
“Ons het saam die puin van die krisis opgeruim en kan met hernude vertroue sê ons land is sterker,” het Obama gesê.
Obama het beklemtoon dat Washington erns moet maak met die begrotingstekort. Hy het eger miljarde dollars se outomatiese besnoeiings wat op 1 Maart intree, as ‘n “baie slegte idee” beskryf.
Hy het ook die Republikeine se planne om aftreevoordele en gesondheidsorg vir seniors aan te pas beskryf as “selfs slegter [idees]”.
“’n Groeiende ekonomie wat goeie, middelklaswerke skep – dit moet die noordelike ster wees wat ons lei,” het hy gesê.
Obama het die meeste passie gewys toe hy oor maatreëls gepraat het om wapengeweld te beheer ná die dood van 20 kinders by ‘n skool in Connecticut in Desember.
“As jy nee wil stem is dit jou keuse,” het hy gesê.
“Hierdie voorstelle verdien ‘n stem.”
Hy het verder aangekondig dat 34 000 van die 66 000 Amerikaanse troepe wat nog in Afganistan is teen volgende Februarie sal terugkeer. Alle troepe sal teen 2014 weer by die huis wees.
Hy het ook gesê Noord-Korea se kerntoets Dinsdag het dié land net méér geïsoleer, en hy het onderneem om saam met Asiatiese bondgenote te werk om verdediging teen moontlike missielaanvalle te versterk.
Obama het verder gesê “Iran moet besef dat hierdie die tyd is vir ‘n diplomatieke oplossing”. Leiers van Iran voer later in die maand met wêreldleiers samesprekings oor dié land se kernprogram.
Hy het gesê hoewel Al-Kaïda ‘n “skadu” is van wat hy eens was, sal sy regering werk om lande soos Jemen, Libië en Somalië met sekerheidsmaatreëls te help. Hy het bygevoeg dat hy bondgenote soos Frankryk sal help om teen ekstremiste in Mali te veg.
Obama het ook die begin van formele gesprekke tussen die VSA en die Europese Unie aangekondig rakende ‘n trans-Atlantiese handelsooreenkoms en hy het ‘n plan hersien om kuberaanvalle op Amerikaanse infrastruktuur te verhoed.
Die president het ook gesê hy wil ‘n wetsontwerp voorstel wat dit vir onwettige immigrante help om binne maande burgerskap te kry.
– Volg Nuus24 op Twitter
- AFP
