Nuwe hoof vir News International aangekondig
2011-07-15 17:01
Londen – Rebekah Brooks, hoof- uitvoerende beampte van Rupert Murdoch se maatskappy News International, het Vrydag bedank en sal deur die hoof- uitvoerende beampte van Sky Italia, Tom Mockridge, vervang word.
“Ek voel baie verantwoordelik vir die mense wat ons seer gemaak het en ek wil weer sê hoe jammer ek is oor wat gebeur het,” het Brooks in ‘n boodskap aan personeellede gesê toe sy haar bedanking aangekondig het.
Daar is toenemende druk op Brooks (43) geplaas om te bedank by News International – moedermaatskappy van die omstrede poniekoerant News of the World – ná ‘n meeluisterskandaal.
Britte het Sondag die laaste uitgawe van News of the World gelees nadat die meeluisterskandaal die poniekoerant ná 168 jaar gedwing het om te sluit.
Die maatskappy News Corp het Vrydag in ‘n verklaring bevestig dat Brooks deur Mockridge vervang sal word. Hy is tans die hoof- uitvoerende beampte van die televisiekanaal Sky Italia.
Beide News International en Sky Italia is deel van Murdoch se News Corp.
Volg Nuus24 op Twitter.
- SAPA