Nóú kom die klappe, glo Romney
2012-01-05 08:00
Den Haag – Die verwarrende uitslag van die eerste Amerikaanse voorverkiesing in die wedloop om die Republikeinse Party se presidentskandidatuur gister het slegs die Demokrate bly gemaak.
Die Republikeinse kiesers van Iowa het geen antwoord gegee op die vraag wie hulle in die plek van pres. Barack Obama in die Withuis wil sien nie.
Soos verwag is, het Mitt Romney, oudgoewerneur van Massachusetts, gewen, maar met ’n naelskraapse meerderheid van agt stemme uit ’n totaal van byna 140 000.
Die groot verrassing is die goeie vertoning van die man wat tweede gekom het, oudsen. Rick Santorum, ’n Rooms-Katolieke fundamentalis wat byvoorbeeld teen voorbehoedmiddels is en álle aborsies – ook in gevalle van verkragting en bloedskande – wil verbied.
Dat Santorum goed in Iowa gevaar het, kan agteraf verklaar word. Hy het byna al sy beperkte geld daar bestee, en Iowa is een van die mees konserwatiewe state in Amerika.
Aanstaande week volg die voorverkiesings in die veel gematigder New Hampshire, Suid-Carolina op 21 Januarie en Florida tien dae later, en die verwagting is dat hy daar stoom gaan verloor.
Romney vorm deel van die Republikeinse gematigde vleuel, en met sy miljoene dollars en goeie organisasie is die kans beter dat hy die pyp daar gaan rook.
Wat teen hom tel, is dat hy reeds verskeie kere oor belangrike sake van mening verander het en dat hy lid van die Mormoonse-sekte is in ’n land waar kerklidmaatskap steeds ’n beduidende faktor by baie kiesers is.
Romney bly in dié stadium steeds die man om te klop. Die ander Republikeinse aspirant-kandidate, soos mnre. Ron Paul (wat Amerika uit die Verenigde Nasies wil laat bedank), Newt Gingrich (oudspeaker van die huis van afgevaardigdes) en Rick Perry (goewerneur van Texas), sal na verwagting in die komende dae intensief nadink of hulle nog in die wedloop wil bly.
Reutersberig Romney het ná sy oorwinning gister op ABC se Good Morning America gesê hy verwag nou éérs dwarsklappe van sy teenstanders.
Gingrich het Romney Dinsdag as leuenaar uitgekryt en Santorum het hom “gematig” genoem, ’n vloekwoord vir baie konserwatiewe Republikeine.
Romney het aan ABC gesê hy skryf sy naalskraapse oorwinning toe aan die feit dat daar so baie kandidate was.
“Jy kan nie met sewe mense in die veld dieselfde doen as met minder nie.”
– Die Burger
– Volg Nuus24 op Twitter
- SAPA