Noodlanding ná kobra man op vliegtuig byt

2012-12-05 14:56

Kaïro – ‘n Egypt Air-vliegtuig wat van Kaïro na Koeweit onderweg was, moes noodgedwonge land ná ‘n kobra glo ‘n passasier gebyt het.

Die 48-jarige passasier, wat ‘n reptielwinkel in Koeweit besit, het die Egiptiese kobra in sy handbagasie weggesteek en het probeer om die slang te hanteer toe dit hom gebyt het en onder die stoele weggeseil het, het CNN berig.

Die kaptein het ‘n noodlanding in die Egiptiese dorp Al Ghardaqa uitgevoer, maar die man wat gebyt is, het glo geweier om behandeling te ontvang.

Die vlug na Koeweit is hervat na amptenare die slang gekonfiskeer het.

‘n Dokter het glo aan die passasier gesê dat hy 24 uur by ‘n waakeenheid moet spandeer, maar die man het steeds geweier.

Volgens kundiges is die kobra se gif so dodelik dat dit ‘n olifant binne drie ure kan doodmaak. ‘n Mens kan binne net 15 minute sterf.

– Volg Nuus24 op Twitter