Nóg twee Tibettane kies vlammedood

2013-02-26 08:28

Beijing – Twee Tibettaanse monnike in hul vroeë twintigs het hulself aan die brand gesteek in opstand teen China se beheer oor Tibet.

Die twee het hulself naby tientalle pelgrims wat saamgekom het vir gebed om die einde van die Tibettaanse Nuwejaarsfees te gedenk, aan die brand gesteek, het ‘n menseregtegroep gesê.

Albei het gesterf.

Een van die monnike, Tsesung Kyab, het homself Maandag buite ‘n tempel in Luqu in die noordwestelike Gansu-provinsie aan die brand gesteek.

Phagmo Dundrup het homself Sondag by ‘n klooster in die Qinghai-provinsie aan die brand gesteek, het die Internasionale Veldtog vir Tibet (ICT) bekendgemaak.

Volgens die ICT het groot getalle gelowige pelgrims by beide kloosters saamgekom vir gebedsbyeenkomste om die einde van die Losar-fees te gedenk. Die groep sê hy het foto’s ontvang van die dood van een van die monnike, Tsesung Kyab.

Altesaam 106 Tibettane het hulself al sedert 2009 aan die brand gesteek.

– Volg Nuus24 op Twitter

 

- Sapa - AP