Nóg seks-bewerings teen Cain
2011-11-08 13:12
Londen– ‘n Vierde vrou het die Amerikaanse republikein en moontlike kandidaat vir die presidentskap Herman Cain van seksuele teistering beskuldig.
Sharon Bialek, ‘n voormalige werknemer van ‘n drukgroep vir restaurante, het gesê Cain het haar teen haar wil onder haar klere betas.
Bialek is die vierde vrou om Cain van seksuele teistering te beskuldig, berig die BBC.
Sy het by ‘n mediakonferensie in New York gesê sy het Cain in 1997 by ‘n funksie van die nasionale restaurantvereniging in Amerika ontmoet.
Cain was die president van die vereniging in die 1990’s.
Toe Bialek ‘n maand later haar werk verloor het, het haar kêrel voorgestel sy moet Cain kontak om haar te help om nuwe werk te soek.
Die beweerde voorval het plaasgevind na Bialek en Cain uit is vir ete om te bespreek of hy haar ‘n werk op provinsiale vlak binne die vereniging kon help loslaan.
“In plaas van na sy kantore gaan, het hy sy hand op my been gesit – onder my romp naby my geslagsdele,” het Bialek gesê.
“Hy het ook my kop in die rigting van sy geslagsdele probeer dwing.”
Cain, wat hoop om die republikeinse presidensiële kandidaat te wees wat president Barack Obama in 2012 sal ontsetel, se woordvoerders het die voorval ontken.
– Lees meer hier.
– Volg Nuus24 op Twitter.