Nóg naskokke tref Christchurch
2010-09-07 04:00
Christchurch - ‘n Skerp reeks van ongeveer 20 naskokke het Christchurch in Nieu-Seeland, wat onlangs deur ‘n magtige aardbewing getref is, deur die nag laat skud – en kenners het Dinsdag gewaarsku dat nóg ‘n sterk skudding die stad in die komende dae kan tref.
Die naweek se kragtige aardbewing het geboue en huise platgeslaan, paaie verniel en die middestad ontwrig. Tog is niemand dood nie en slegs twee mense is ernstig beseer.
Die middestad was teen Dinsdag steeds deur troepe afgebaken. Slegs eienaars van geboue en werkers is ingelaat om die gemors te begin opruim. ‘n Groot deel van die middestad het soos ‘n spookdorp gelyk.
Meer as 100 naskokke het die stad sedert Saterdag se kragtige aardbewing laat skud.
Deur die nag het sowat 20 skokke die stad laat rittel. Volgens kenners sal naskokke nog weke lank aanhou – en die ergste van hulle kom dalk nog.
“Dit is moontlik dat ons ‘n kragtige naskok in die volgende week sal beleef. Mense moet bewus wees daarvan, veral as hulle om strukture beweeg wat reeds beskadig is,” het Ken Gledhill, ‘n monitor by die geologiese agentskap GNS Science, gesê.
“Met ‘n vlak aardbewing soos dié kan die skokke nog weke lank aanhou.”
Die aardbewing het die stad, met sy 400 000 inwoners, Saterdagoggend vroeg getref. Honderde geboue is beskadig en kragtoevoer na die gebied is afgesny.
Ongeveer 100 000 van die gebied se 160 000 huise het skade opgedoen.
- Sapa - AP