Nóg 'n bom ruk Bagdad
2009-12-09 11:56
Bagdad - 'n Polisiebeampte in Irak sê 'n bom wat in 'n hoop vullis versteek is, het die lewens van twee mense in die noorde van Bagdad geëis.
Dié ontploffing het omstreeks 08:00 Woensdagoggend plaasgevind terwyl straatveërs besig was om in Azamiyah skoon te maak.
Die beampte wat anoniem wou bly, het gesê twee straatveërs is dood en drie verbygangers gewond.
Dié ontploffing kom 'n dag ná 'n reeks selfmoordbomaanvalle in Bagdad wat die lewens van 127 mense geëis en 500 gewond het.
Wetmakers het 'n beroep op sekerheidsbeamptes gedoen om in die parlement te verskyn en vrae te beantwoord oor die slaggate in die sekerheidstelsel.
– Sapa-AP