Nóg 'n bejaarde sterf ná tehuis-brand
2011-11-30 11:15
Sydney – ‘n Bejaarde vrou is die elfde slagoffer van ‘n brand wat twee weke gelede by ‘n tehuis uitgebreek het, het die polisie gesê.
Die 83-jarige vrou het Dinsdag in die Royal North Shore-hospitaal se brandeenheid gesterf. Sy is in dié hospitaal behandel nadat ‘n massiewe brand op 18 November by die Quakers Hill-tehuis in Sydney, Australië, uitgebreek het.
Talle ander bejaarde inwoners van die tehuis het beserings opgedoen.
Drie inwoners het op die toneel gesterf, terwyl agt ander later aan hul beserings beswyk het.
Die polisie het intussen bevestig dat ‘n personeellid van die tehuis verantwoordelik is vir die brand.
Roger Dean (35), ‘n verpleër by die sorgeenheid, staan tereg op agt aanklagte van moord weens die verdagte brand.
Volg Nuus24 op Twitter
- Sapa - AFP