Nóg 'n VK-koerant dalk betrek by afluisterskandaal
2012-01-16 21:00
Londen – Die redakteur van Brittanje se Daily Mirror-poniekoerant sê dit is moontlik dat dié koerant ook onwettig stemboodskappe afgeluister het.
Richard Wallace het Maandag aan die land se ondersoek na media-etiek gesê dat die afluistering van stemboodskappe "mag dalk" in die vroeë 2000's by die Mirror plaasgevind het.
Hy het egter gesê hy dra geen kennis daarvan nie en hou vol "etiese kwessies word ingesluit by die kultuur van die nuuskantoor".
Piers Morgan, aanbieder van die televisieprogram Piers Morgan Tonight op CNN, wat tussen 1995 en 2004 redakteur van die Daily Mirror was, het aan die ondersoekspan gesê hy glo nie hy het ooit stemboodskappe afgeluister nie.
– Volg Nuus24 op Twitter.
- AP